Matagumpay na isinagawa ng Baliwag Water District (BWD) ang Operations Planning and Budget Hearing para sa taong 2026 noong Nobyembre 12, 2025 sa kanilang tanggapan. Layunin ng pagtitipong ito na pagplanuhan at pondohan ang mga programang magpapahusay pa sa operasyon at serbisyo para sa lahat ng konsesyonaryo ng distrito. Pinagunahan ang nasabing aktibidad ng mga Board of Directors kasama sina GM Ma. Victoria E. Signo , dalawang Assistant General Managers at mga Division at Department Heads, na sama-samang bumuo ng mga plano at estratehiyang tutugon sa lumalawak na pangangailangan sa suplay ng tubig, imprastraktura, at serbisyong teknikal. Sa naturang pagpupulong, tinalakay ang pagsusuri ng kasalukuyang operasyon upang matukoy ang mga puwang at oportunidad para sa 2026, kabilang ang pagpaplano ng mga proyekto at inisyatiba gaya ng pagpapabuti ng water supply, modernisasyon ng kagamitan, at mas episyenteng customer services. Kasama rin dito ang paghahanda at pagsusuri ng taunang budget na nakabatay sa mga prayoridad na programa at kinakailangang pondo para sa pagpapatuloy ng kalidad na serbisyo. Bukod dito, binigyang-diin ang mas pinaigting na pakikipag-ugnayan ng bawat departamento upang matiyak ang maayos na pagtutulungan at pagkakahanay ng mga plano para sa susunod na taon. Pinagtibay sa pagpupulong ang mga direksyong gagabay sa operasyon ng BWD para sa 2026, na may diin sa responsableng pangangasiwa ng pondo, pagpapalakas ng serbisyo publiko, at pagtiyak na matutugunan ang pangangailangan ng mga konsesyonaryo sa maaasahan, malinis, at sapat na suplay ng tubig. Sa pangunguna ng mga pinuno mula sa bawat departamento, nananatiling nakatuon ang Baliwag Water District sa pagbuo ng mga planong makapagbibigay ng mas mataas na antas ng serbisyo at mas matatag na operasyon sa darating na taon.